Rangfærslur í auglýsingu Samfylkingarinnar

Rétt fyrir kl. 8 í morgun hlustaði ég á útvarpið í bílnum mínum á leið minni á fastan morgunfund okkar frambjóðenda í Valhöll. 

Þá var spiluð auglýsing Samfylkingarinnar með rödd eins frambjóðanda flokksins um stefnu hans varðandi tannheilsu íslenskra barna. Þar var fullyrt að hún hafi versnað á síðustu árum.   

Þetta er einfaldlega rangt.

Hér er líklega verið að vísa í nýlega kynnta rannsókn á tannheilsu Íslendinga.  Hana má nálgast hér , en þar er m.a. borin saman tannheilsa íslenskra barna á árunum 1995 og 2005

Þar segir m.a eftirfarandi:

"Tíðni tannskemmda meðal barna og unglinga á Íslandi lækkaði mjög hratt á árunum 1986-1996 en undanfarin áratug virðist hafa hægt mjög á þeirri jákvæðu þróun.

Ef eingöngu er miðað við niðurstöður sjónrænnar greiningar nú virðast litlar breytingar hafa átt sér stað á tannheilsu 6, 12 og 15 ára barna og ungmenna undanfarin 10 ár..." 

Fullyrðing frambjóðandans um versnandi tannheilsu íslenskra barna stenst því ekki og er röng. 

Þetta eru óvönduð vinnubrögð frá hendi Samfylkingarinnar og vekur spurningar um annað áróðursefni sem frá þeim kemur.   

 

 

Athugasemdir

[Inga Lára Helgadóttir, 26.4.2007 kl. 21:10]

Sæl, ég var einmitt búin að heyra þetta með versnandi tannheilsu barna, en ég verð að segja eins og er að mér fannst ekkert mál að greiða 2200 krónur til tannlæknis um daginn fyrir son minn og fæ um 50% af því endurgreitt.... , en svo er auðvitað annað ef þarf að gera eitthvað sérstakt við tennurnar svo að það kosti aðeins fleiri aura en þá sem ég greiddi síðast... vonum að komi nú ekki til þess.

En er einhversstaðar hægt að sjá tölur um þetta ? Ef einn flokkur segir eitt og annar flokkur segir annað, ég vil ekki rengja neinn, en er ekki bara hægt að birta tölur um þetta ? Tannheilsa barna er búin að vera mikið í umræðunni.

Eins með háskólana, þar sem Sigurður Kári sagði Ólaf Ágúst fara með rangt mál að við værum í 21. sæti af OECD löndum varðandi Háskóla, Sigurður vildi meina að við værum númer 5. Hvort sem það er rétt eða rangt, þá ættu flokkarnir að skoða þetta í sameiningu og komast að niðurstöðu og birta hana..... er það ekki ?

Kær kveðja Inga

[Inga Lára Helgadóttir, 26.4.2007 kl. 21:11]

og ég vil bæta því við að ef börn eru að mæta með ónýtar eða skemmdar tennur og kostnaður ekki meira en þessi, þá mundi ég kalla það vanrækslu !!!!! en svo eins og ég sagði áðan er það annað ef um einhver ákveðin mál væri að ræða.

[Bergur Þorri Benjamínsson, 26.4.2007 kl. 23:01]

Innan  minnar fjölskyldu er tannlæknir og hann merkir versnandi tannheilsu barna og nefnir tvær ástæður fyrir því. Lækkandi endurgreiðslur og aukinn hraða. Börn sem flytjast af höfuðborgarsvæðinu og hingað norður koma til að mynda verr út en aðrir krakkar.  Síðan er spurningin sú ...Af hverju á ekki að greiða jafnmikið fyrir lækningar í munnholi og annars staðar í líkamanum.....??????