Reiðþjálfun í höfn

Hestamenn sem sóttu landsmót hestamanna á Vindheimamelum í Skagafirði árið 2002 muna þegar Önnu Bretaprinsessu var færður hestur að gjöf með þeim orðum að hann væri ætlaður til þjálfunar fatlaðra barna í heimalandi hennar.  Hesturinn fældist reyndar lítillega við athöfnina og annar sendur í hans stað til Bretlands, en það er önnur saga!

Í dag átti ég þess kost að vera viðstödd í reiðhöll hestamannafélagsins Gusts í Kópavogi, þegar Siv Friðleifsdóttir heilbrigðisráðherra undirritaði reglugerð sem heimilar þátttöku Tryggingastofunar ríkisins í greiðslu reiðþjálfunar, sem meðferð í sjúkraþjálfun.

Þetta var afar ánægjulegur viðburður, sem mun skipta miklu máli fyrir fjölmarga fatlaða, ekki síst fötluð börn.

Ég flutti fyrirspurn á Alþingi fyrir nokkrum misserum um þessi mál og benti m.a. á að íslenski hesturinn þyki sérlega vel fallinn til reiðþjálfunar fatlaðra og ræður þar bæði bygging hans og eðliseiginleikar. Hann er fremur smávaxinn með góða lund og ólíkar gangtegundir hans eru gagnlegar við hæfingu og þjálfun fatlaðra.  Með reiðþjálfun er m.a. hægt að bæta líkamsbeitingu, jafnvægi og hreyfifærni fatlaðra barna, auk þess að vera ánægjuríkt og hvetjandi sem meðferðarform.

Um nokkurt skeið hafa sérhæfðir sjúkraþjálfarar beitt reiðþjálfun fyrir fötluð börn, m.a. í sumarbúðum Styrktarfélags lamaðra og fatlaðra í Reykjadal.  Fyrirspurn mín beindist að því spyrja heilbrigðisráðherra hvort hann ætlaði að beita sér fyrir því að reiðþjálfun yrði viðurkennt meðferðarform við sjúkraþjálfun fatlaðra barna og nyti greiðsluþátttöku Tryggingastofnunar ríkisins. Siv heilbrigðisráðherra lýsti skilningi og stuðningi við málið.

Í framhaldi af fyrirspurn minni og með samvinnu og hvatningu margra aðila, m.a. Styrktarfélags lamaðra og fatlaðra, Félagi íslenskra sjúkraþjálfara og annarra aðila varð þessi langþráði draumur margra að veruleika í dag.   

Því ber að fagna og fyrir það að þakka.  Hópur fatlaðra barna og foreldrar þeirra glöddust sérstaklega í dag.  

Athugasemdir

[Lafðin, 25.4.2007 kl. 14:56]

Tek heilshugar undir með þér Ásta, gladdist fyrir hönd barnanna og þeirra aðstandenda.  Það er fátt yndislegra en bros barnsins þegar það er komið á bak, þvílík gleði sem skín úr andlitum þeirra og árangurinn af þessu mikilvæga starfi er ótvíræður.  Sýnir hversu fjölbreytt þjálfunarúrræði eru.