Afstaða til innflytjenda

 

Það er erfitt að átta sig á hvaða mið Frjálslyndir ætla að róa í kosningunum framundan.

Eina málið sem þeir halda á lofti í kosningabaráttunni er hertari löggjöf um innflytjendur með undirtón andstöðu við þá.   Þar skera þeir sig frá öðrum flokkum.

Í skoðanakönnun Blaðsins í dag kemur fram að um 76% þeirra sem tóku þátt í skoðanakönnuninni telja að vera innflytjenda hér á landi sé lítið eða ekkert vandamál.  Tæp 13% telja að það færi með sér mikinn vanda og rétt um 4% að um mjög mikinn vanda sé að ræða.

Kannski er það þessi 4% sem frjálslyndir eru að sækjast eftir og gangi það eftir má spyrja sig hvort það sé kjörfylgið sem þeir óska sér.    Verði þeim að góðu!

Það sem vekur einnig athygli er að landsbyggðarfólk, sérstaklega þeir sem búa á Norð-austurlandi og hafa mesta reynslu af samskiptum við innflytjendur og erlenda starfsmenn eru jákvæðastir í garð innflytjenda.

Það bendir til að aukin kynni og aukin samskipti við innflytjendur, auka jákvæðni í þeirra garð.

Af gefnu tilefni, þar sem Sigurjón Þórðarson sendi mér línu hér á bloggið um afstöðu Sjálfstæðisflokksins varðandi málefni innflytjenda þá langar mig að láta fljóta hér með hluta úr nýsamþykktri landsfundarályktun um fjölskyldumál, þar sem fjallað er um málefni innflytjenda: 

"Innflytjendur hafa auðgað íslenskt menningar- og atvinnulíf. Íslenskukennsla fyrir innflytjendur og afkomendur þeirra er lykill að íslensku samfélagi. Jafnframt á að gefa nemendum kost á að taka próf á öðru tungumáli ef fullnægjandi íslenskukunnátta er ekki til staðar. Íslenskukennsla á vinnustað og í vinnutíma er eftirsóknarverð.

Skýra skal reglur og viðmið þegar mat fer fram á menntun og námi sem innflytjendur hafa aflað sér í menntastofnunum erlendis.

Bæta skal upplýsingaflæði til innflytjenda og aðstandenda þeirra á þeirra tungumáli, t.d. um réttindi sem tengjast dvalar- og atvinnuleyfi þeirra. Túlka- og þýðingarþjónustu ber að stórefla.

Vernda þarf samningsbundinn rétt erlends starfsfólks, þannig að tryggt sé að þeim sé greitt samkvæmt samningum og það njóti sömu kjara og aðrir launþegar"

Athugasemdir

[Kristján H Theódórsson, 17.4.2007 kl. 13:53]

Sæl Ásta , þessi samþykkt landsfundar ykkar er einmitt dæmi um árangur af málflutningi okkar Frjálslyndra , sem hefur að grunni til þessar áherslur sem þið takið upp í ykkar samþykktir! Ég vil nú ekki trúa því að þú haldir okkur ganga neitt annað til en að vilja öllum, bæði innfæddum og aðfluttum allt hið besta, en náum jafnframt að forðast þau slys sem víða erlendis hafa hent í þessum viðkvæma málaflokki!  Vandamálin mega ekki ná að búa um sig , betra að hafa vaðið fyrir neðan sig, o.s.frv!

Ég veit að minn gamli flokkur, sem enn er þinn flokkur ,vill ekki láta núa sér um nasir útlendingahatri og ótta. En mörgum þóttuð þið ganga ansi tæpt á línuna þegar 24 ára ákvæðið var sett, sem í framkvæmd hefur verið notað af hörku til að stía sundur hjónum! Svo maður tali nú ekki um framgönguna gegn Falung gong forðum!

[Jenný Anna Baldursdóttir, 17.4.2007 kl. 21:56]

Erlingur er í ´beinharðri afneitun.  Takk Ásta fyrir þennan pistil.  Alltaf gott þegar fólk skrifar á málefnalegan hátt um þetta efni.  Ég held að frjálslyndir ríði ekki feitum gölt frá þessum kosningum.

[Jenný Anna Baldursdóttir, 17.4.2007 kl. 21:57]

hm "gelti" mein ég að sjálfsögðu.

[María Anna P Kristjánsdóttir, 18.4.2007 kl. 09:51]

Takk fyrir þessa grein, það þarf að taka á þessum málum á málefnalegan  hátt.