Lífeyrir er ekki tvískattaður

Það er rangt að lífeyrir frá lífeyrissjóðunum sé tvískattaður. Þessu er m.a. haldið fram í leiðara Blaðsins í dag og þetta var fullyrt af formanni Samfylkingarinnar, Ingibjörgu Sólrúnu Gísladóttur í Kastljósi á annan í páskum.

Í leiðara Blaðsins í dag segir m.a. eftirfarandi: "Þetta fólk ( þ.e. aldraðir, innskot ám ) greiddi skatta af lífeyrissjóðsgreiðslum meðan það var á vinnumarkaði og gerir það aftur nú þegar það fær þennan lögskipaða sparnað borgaðan út. Það er ósanngjarnt."  Ég get tekið undir þetta, ef það væri rétt, en svo er ekki .  Það verður heldur ekki réttara þó það sé síendurtekið. 

Sem regla hafa iðgjöld til lífeyrissjóða verið frádráttarbær frá skatti.  Iðgjaldahluti fyrirtækja sem hefur verið og er á bilinu 6-11,5% hefur alltaf verið dreginn frá skatti eins og annar launakostnaður.  Iðgjaldahluti launþega í samtryggingu lífeyrissjóðanna sem löngum hefur verið 4%, hefur verið undanþeginn tekjuskatti, að undanskildu 7 ára tímabili frá 1988 til ársins 1995.  Þegar staðgreiðsla skatta var tekin upp á árinu 1988 var persónuafsláttur hækkaður verulega og inn í hann voru m.a.. felldir þættir eins og iðgjald í lífeyrissjóð og vaxtagjöld.  Frá árinu 1995 var fyrra kerfi tekið upp og iðgjald launþega var dregið frá tekjum fyrir skatt.

Því er það rangt sem Blaðið heldur fram í dag og hefur verið fullyrt af mörgum við ólík tækifæri að lífeyrisgreiðslur séu tvískattaðar.  Það er einnig á mörkunum að fullyrða á þessu sjö ára tímabili hafi verið um tvísköttun að ræða, því kerfisbreytingin var þess eðlis.   

Athugasemdir

[Ásta Möller, 11.4.2007 kl. 16:48]

Sæll Hrafnkell.  Þetta er einfaldlega ekki rétt.  Það væri fróðlegt að sjá þessa launaseðla. Er hvenær sem er tilbúin að kíkja á þá með þér.  Kær kv. Ásta Möller

[Ásta Möller, 13.4.2007 kl. 09:09]

Ég verð að leiðrétta sjálfa mig í svarinu til Hrafnkels hér á undan.  Í blogginu segi ég eftirfarandi: "Sem regla hafa iðgjöld til lífeyrissjóða verið frádráttarbær frá skatti.  Iðgjaldahluti fyrirtækja sem hefur verið og er á bilinu 6-11,5% hefur alltaf verið dreginn frá skatti eins og annar launakostnaður.  Iðgjaldahluti launþega í samtryggingu lífeyrissjóðanna sem löngum hefur verið 4%, hefur verið undanþeginn tekjuskatti, að undanskildu 7 ára tímabili frá 1988 til ársins 1995."  Launaseðlar Hrafnkels falla innan þessa tímabils og því rétt hjá honum að iðgjöld launþega voru skattlögð á þessum tíma.  Þó með þeim fyrirvara sem kemur fram í blogginu:  Þegar staðgreiðsla skatta var tekin upp á árinu 1988 var persónuafsláttur hækkaður verulega og inn í hann voru m.a.. felldir þættir eins og iðgjald í lífeyrissjóð og vaxtagjöld.  Frá árinu 1995 var fyrra kerfi tekið upp og iðgjald launþega var dregið frá tekjum fyrir skatt. "   Ég mislas hvaða ár hann var að vísa til og bið hann afsökunar á því.

Það breytir því ekki að það er rangt að fullyrða að fólk hafi greitt skatt á lífeyri bæði í inngreiðslu og útgreiðslu.  Það var einungis gert á 7 ára tímabili, með þeim fyrirvörum sem að framan greinir.     

Ásta Möller