Munur á hagstjórn hægri og vinstri manna.

Í spjalli hér á bloggsíðunni um páskahelgina urðu nokkur orðaskipti milli okkar Hlyns Hallssonar, núverandi varaþingmanns VG.  Hlyni fannst ég mála vinstri menn svörtum litum í athugasemdum hér á síðunni,  dró þær í efa og kallaði hræðsluáróður þegar ég sagði m.a.:

"Sjálfstæðisflokkurinn er eini flokkurinn sem getur tryggt farsæld og aukna hagsæld fjölskyldunnar til langframa. Það sýna m.a. tölur um að kaupmáttur launa fjölskyldunnar hefur aukist um tugi prósenta á síðustu árum undir forystu Sjálfstæðismanna.  VG er hreinn vinstri flokkur, þótt hann hjúpi sig grænni skykkju, sem hefur villt um fyrir fólki.  Hreinn vinstri flokkur sem hækkar skatta, fer illa með opinbert fé, hneppir atvinnulíf í ríkisfjötra, eykur verðbólgu og allt hefur þetta áhrif á afkomu fjölskyldunnar til hins verra. Treystir einhver VG í ríkisfjármálum?  Fólk er búið að gleyma hvernig vinstri menn stjórna í landsmálum.  Það þarf að varast vinstri slysin!"

Þessi orðaskipti urðu tilefni til að ég gróf upp grein sem ég skrifaði fyrir kosningarnar 2003 og var birt í Fréttablaðinu undir yfirskriftinni "Ávísun á verðbólgu og hærri skatta." Greinin stendur fyrir sínu, en þar vitna ég í  ummæli tveggja fræðimanna um mun á hagstjórn hægri og vinstri manna

 Þar segir ég m.a., eftirfarandi:

"Í bókinni "Frá kreppu til viðreisnar - Þættir um hagstjórn á Íslandi á árunum 1930-1960", sem kom út á síðasta ári í ritstjórn Jónasar H. Haralz, ritar Þórunn Klemensdóttir grein um "Pólítískar hagsveiflur á Íslandi 1945-1998". Þar greinir hún m.a. pólítísk áhrif hægri stjórna annars vegar og vinstri stjórna hins vegar á helstu kennitölur efnahagsstjórnunar hér á landi. Skv. skilgreiningu hennar eru hægri stjórnir þær sem Sjálfstæðisflokkurinn á aðild að. Aðrar teljast vera vinstri stjórnir.

Í grein Þórunnar kemur m.a. fram að á umræddu árabili er verðbólga umtalsvert hærri í tíð vinstri stjórna eða 24,5% að meðaltali í samanburði við 15,1% þegar hægri stjórnir eru við völd. Frá 1998 hefur þetta meðaltal lækkað enn. Þá er greinilegur munur á útgjaldaaukningu ríkisins eftir hvernig stjórn er við völd eða 11.2% að meðaltali á ári hverju í tíð vinstri stjórna til samanburðar við 3,3% útgjaldaaukningu á ári í tíð hægri stjórna.

Að sömu niðurstöðu kemst Gunnar Helgi Kristinsson, prófessor í stjórnmálafræði, í bók sinni "Úr digrum sjóði - fjárlagagerð á Íslandi" sem gefin var út 1999. Þar segir hann m.a. "að hægri stjórnir séu aðhaldssamari í fjármálum ríkisins en aðrar og að vinstri stjórnir eyði meiru." Sérstaklega er bent á að útgjöld drógust saman þegar Sjálfstæðisflokkurinn var við stjórn, en þau jukust þegar Alþýðubandalagið var við stjórn. Fylgismenn Alþýðubandalagsins sáluga eru nú klofnir í tvo flokka, Samfylkinguna og Vinstri græna.

Framangreindir sérfræðingar í hagfræði og stjórnmálafræði hafa með athugunum sínum á tengslum stjórnarmunsturs annars vegar og verðbólgu og útgjaldaaukningar ríkisins hins vegar komist að álíka niðurstöðu: Hægri stjórnir eru hæfari, en vinstri stjórnir í stjórnun efnahagsmála. "

Greinin er birt á heimasíðu minni á þessum tengli: http://astamoller.is/grein.php?id_grein=153&b=1

Athugasemdir

[Inga Lára Helgadóttir, 9.4.2007 kl. 21:41]

ég er sammála mörgu sem kemur fram í textanum, en talað er einnig um að aðstæður þegar vinstri menn voru síðast við stjórn hafi verið mjög slæmar. En ég sé líka mart rangt í því hvernig þeir vilja hafa þetta, en ég sé líka því miður mart ekki í lagi eins og staðan hjá okkur er í dag. Mér finnst vera of margir sem hafa það ekki gott, það er erfitt að lifa af sem námsmaður hér á landi og það er mart annað sem ég er mjög ósátt við sem mætti bæta og það eru stór hluti sammála því og það er enginn sem getur sagt að það sé einhver "vitlausari hluti" sem segi það. Ég meina það er gott að búa við kerfið ef maður er efnaður, en það er búið að hunsa allt of mart af því sem betur mætti fara. 

[Inga Lára Helgadóttir, 9.4.2007 kl. 21:43]

Aðeins svo ég geti bætt við, þá var td. hægri stjórn sem kom á í borgarstjórninni núna síðast, ég get ekki sagt að ég finni einhvern mun á því, jú það er orðið dýrara í strætó og dýrara í sund, einmitt eitthvað sem ætti að kvetja fólk að gera meira af.