Nýr veruleiki

Sjálfstæðisflokkurinn er í stjórnarandstöðu .  Miðað við viðbrögð þingmanna hinna flokkanna á Alþingi er eins og þeir séu ekki búnir að átta sig á því.

Það hafa orðið hlutverkaskipti og þingmenn Sjálfstæðisflokksins eru að þreifa sig áfram í þessari nýju stöðu.   Þingmenn Sjálfstæðisflokksins hafa gerst þaulsetnir í ræðustól síðustu daga og kvarta stjórnarliðar hástöfum undan elju þeirra og tengja hana komandi prófkjörum. Eins og þingmenn annarra stjórnmálaflokka séu ekki í sömu stöðu um þessar mundir! 

Stjórnarandstöðuflokkar hafa sérstöku hlutverki að gegna að veita stjórnarliðum aðhald.  Þetta er  meðal annars gert undir dagskrárliðnum störf þingsins sem er hálftíma umræða í byrjun þingfundar tvisvar í viku. Þá beina þingmenn fyrirspurnum að kollegum sínum, t.d. formönnum þingnefnda.   Aðra tvo þingdaga í viku hverri beina þingmenn fyrirspurnum sínum til ráðherra í óundirbúnum fyrirspurnum.  Samkvæmt lauslegri athugun minni voru þingmenn stjórnarandstöðunnar í  um 90% tilvika frummælendur undir þessum liðum þingsins á haustþingi.   Þetta hefur nú snúist við, sem þingmenn stjórnarliða eiga erfitt með að höndla og þusa yfir.

Viðbrögð stjórnarliða við framgöngu okkar sjálfstæðismanna á þingi segja mér að við erum að gegna hlutverki okkar með sóma.  Fyrst og fremst leggjum við áherslu á að vera málefnaleg, þótt fjölmiðlar veiti því síður athygli en „uppákomum" og skærum manna á milli í umræðum.   

Ég skil það einnig svo að þau, ekki síður en við í þingflokki sjálfstæðismanna og almenningur allur, þarf að venjast því, tímabundið, að Sjálfstæðisflokkurinn er í stjórnarandstöðu.

Athugasemdir

[Ægir Óskar Hallgrímsson, 12.2.2009 kl. 21:34]

Ásta, Sjálfstæðisflokkurinn á að halda þannig á málunum að það séu málefnin sem séu í fyrirrúmi, með því móti styrkist flokkurinn fyrir komandi átök þann 25. Apríl, afskaplega leiðinlegt að hlusta á hver kom með þetta frumvarp, það var ég, nei ég, hverslags rugl er þetta, við eigum að hugsa um þjóðarhag, það er það sem skiptir máli.

[Sveinn Valdimar Ólafsson, 13.2.2009 kl. 10:26]

Sæl Ásta

Þjóðarhagur er fyrir öllu og nú þurfa flokkar að vinna saman að uppbyggingunni. Fljótt skipast veður í lofti og þeir sem voru við völd í gær en eru ekki í dag verða það aftur á morgun. Það gæti endurtekið sig nokkrum sinnum á komandi árum.

kv Svenni